کیویز کپتان بھی چیمپئنز ٹرافی میں بھارت کو دبئی میں فائدہ ملنے پر بول پڑے

کیویز کپتان مچل سینٹنر کا کہنا ہے کہ بھارت کو اپنے میچز دبئی میں کھیلنے کا فائدہ پہنچا۔ چیمپئنز ٹرافی کے فائنل کیلئے میچ آفیشلز کا اعلان بھی کردیا گیا۔

کیوی کپتان کا کہنا ہے کہ بھارت نے اپنے تمام میچز دبئی میں کھیلے ہیں، انہیں وہاں کی پچز اور کنڈیشنز کا علم ہے، زیادہ میچز کھیلنے سے پتہ چلتا ہے کہ آپ نے کیسے کھیلنا ہے۔

اس سے قبل انگلینڈ اور آسٹریلیا کے کپتان پیٹ کمنز نے کہا تھا کہ آئی سی سی نے جان بوجھ کر بھارت کے تمام میچز دبئی میں رکھ کر اُس کو فائدہ پہنچانے کی کوشش کی ہے۔

دوسری جانب، چیمپئنز ٹرافی فائنل کیلئے میچ آفیشلز کا اعلان کر دیا گیا ہے۔ فائنل مقابلے کیلئے پال ریفل اور رچرڈ النگورتھ امپائرنگ کے فرائض سر انجام دیں گے ۔ جوئیل ولسن تھرڈ امپائر اور رنجن مدوگالے میچ ریفری ہوں گے۔ چیمپئنز ٹرافی کا فائنل بھارت اور نیوزی لینڈ کے درمیان اتوار کو دبئی میں کھیلا جائے گا۔